Евгений Дармин

Евгений Николаевич Дармин — альпинизм боюнча СССРдин спорт чебери, нускоочу, «Ак илбирс», спорттук багыт берүү боюнча I разряддын ээси. Бала кезинен тоо туризми боюнча З. Вдовкинойдун жетекчилигинде алектенип келген. 1974-жылдан тартып А. Тустукбаевдин жетекчилигинде «Политехник» секциясында, ал эми 1976-жылдан тартып «Скиф» секциясында (Ф. Поповдун жетекчилигинде) машыгат.

Өгүз-Башы (5181 м, 5А), Таажы — Байлян-Баши (5А), Скрябин — Двурогая (5Б) тоо кыркаларын траверс ыкмасы менен басып өткөн, Кыргызстан чокусун (5Б, «Буревестник» ыктыярдуу спорттук коому спорт борборунун чемпионатында I орун), Блюхер чокусун (4720 м, 5А), Жигит чокусун (5170 м, аскалар боюнча 5Б), кайра Жигит чокусун (түндүк капталынын борбору боюнча, 6-т.к.) жана башка көптөгөн чокуларды багындырган. Көбүнчө техникалык жактан татаал маршруттарда биринчи болуп жүргөн. Өгүз-Башынын чыгыш чокусуна (5018 м, 5Б+1), Шокальский чокусуна (5722 м, 6-т.к.) чыгууларды жетектеген.

1987-жылы үч жети миң метр бийиктиктеги чокуга көтөрүлгөн. 1988-жылы Хан-Теңири чокусунун чыгыш капталынын борбору боюнча татаал көтөрүлүүдө команданын капитаны болгон (6995 м, 6Б, экспедициянын жетекчиси В. Денисов). Ал 5 жана 6-татаалдык категориясында 26 жолу бийиктикке көтөрүлгөн.