Александр Губаев

Александр Рафаэлович Губаев — КР альпинизм боюнча спорт чеберине талапкер, «Ак илбирс». «Политехник» (А. Тустукбаевдин жетекчилигинде) секциясынын тарбиялануучусу. Аскерден кийин «Скиф» (Ф. Поповдун жетекчилигинде) секциясына өткөн. 1987-жылы нускоочулар мектебин аяктаган. Анын эсебинде Ак-Сай тоо кыркаларынын чокулары бар (Байчечекей — Шваб каттамы, 5Б, Эркин Корея — Барбер каттамы, 5А ж.б.).

1998-жылы «Политехник» секциясын жандандырып, Федор Попов, Сергей Никишин, Андрей Пучинин секциянын машыктыруучулары болушкан. 1998-жылы Кыргызстандын чокуларынын акыркысы алты миң метр бийиктиктеги Корумду чокусу (6613 м) калган. Губаевдин демилгеси менен бул чоку ийгиликтүү багындырылган. Акклиматизация үчүн Губаевдин командасы адегенде аталышы белгисиз беш миң метр бийиктиктеги (5368 м) чокуга чыгышат, аталган чоку Александр өлгөндөн кийин Губаев чокусу деп аталып калган. 1999-жылы «Ак илбирс» программасын аяктаган. Губаев альпинизм ишинен тышкары, секциялаштары менен балдар үйлөрүнө концерттер, белектер менен барып кайрымдуулук иш-чараларын уюштуруп турган.

2002-жылы Александр Мак-Кинли чокусуна көтөрүлгөн (6190 м, Түндүк Америка). 2003-жылы Александр «Рейд Голуаз» мультиспорту боюнча 12-чемпионатка катышуу үчүн Кыргызстандын командасын даярдаган. Губаев 2004-жылы К2 чокусуна чыгып, бирок артка кайтпай калган биринчи кыргызстандык болуп калган.