Дмитрий Греков

Дмитрий Михайлович Греков — альпинизм боюнча СССРдин спорт чебери, альпинизм боюнча эмгек сиңирген спорт чебери, I категориясындагы нускоочу, «Ак илбирс», каноэде сүзүү боюнча СССРдин спорт чебери. Жаш кезинен альпинизм менен өз алдынча машыккан. 1984-жылдан «Скиф» секциясында тарбияланган. 1989-жылдан тартып «Ала-Арча» көзөмөл-куткаруу пунктунун улук нускоочусу. 5- жана 6-татаалдык категориясындагы Ала-Арча тоосунун көптөгөн чокуларына чыккан, анын ичинде Эркин Корея (4777 м) чокусуна кышкы чыгуунун катышуучусу.

Дмитрийдин эсебинде бир нече чокуларды алгачкылардан болуп багынтуулар бар, Хан-Теңири чокусуна классикалык эмес маршруттар менен чыккан, бардыгы болуп 100гө жакын татаалдыктын жогорку категорияларына (16 — 6А жана 6Б, 39 — 5Б) чыгып, альпинизм боюнча 13 чемпионатка катышкан. 10 чемпионатта командасы 1-орунга ээ болгон. 1997-жылы Дмитрий Греков Эверест чокусуна чыккан (8848 м) биринчи кыргызстандык болгон. Бул үчүн ага эмгек сиңирген спорт чебери наамы ыйгарылган. 1999-жылы «Ак илбирс» наамы үчүн ченемдерди аткарган. Непалдагы Ама-Даблам чокусуна (6812 м) жана Пакистандагы Нанга-Парбат чокусуна (8125 м) кыргыз экспедициясын уюштурган.