Боривой Маречек

Боривой Рудольфович Маречек (1917–2001) — альпинизмде 1937-жылдан тартып: О. Д. Аристовдун инструкторлор мектебин бүтүргөн (бардыгы 9 адам). 1938-жылдан 1939-жылга чейин НКВД тарабынан камакка алынган. 1939-жылы бир тууганы Владивой жана эки катышуучу (Б. Михайлов жана Р. Любченко) менен бирге Ала-Арчанын жогорку бөлүгүндөгү Логвиненко (4361 м) – Токтогул (4350 м) чокуларынын траверсин (4Б татаалдык категориясы) өткөн. Согуш башталганга чейин альпинизм боюнча инструктор болгон.

Генерал Людвиг Свободанын (кийин Чехословакия ССРинин президенти) командачылыгындагы 1-чехословакиялык армия корпусуна кызматка кирген. 1-чехословакиялык корпус СССР аймагында жашаган чехтер жана словактардын ичинен түзүлгөн. 1944-жылдын август айынан тартып корпус маршал И. Коневдин командачылыгындагы 1-Украина фронтунун курамына кирген. Боривой Маречек Карпат жана Жогорку Татра тоолуу аймактарында согушкан. Чехословакиянын аскердик крести жана советтик медалдар менен сыйланган.

Пржевальск шаарындагы (1943) жана Ош шаарындагы (1947) альпинизм секцияларынын негиздөөчүсү, Ала-Арча альплагерин негиздөөчүлөрдүн бири (1951). Альпинизм боюнча спорт чебери (1951, 1965), туризм боюнча спорт чебери (1965). Кыргыз Ала-Тоо кырка тоосунун жана башка айрым кырка тоолордун орографиялык карта-схемаларын түзгөн, Кыргыз ССРинин туризм боюнча маршруттук-квалификациялык комиссиясынын төрагасы болгон.